Облыс орталығында №2 сотта Павлодар қаласында үш адамды қағып, өмірлерін қиған Жамбыл Мұхантаевтың ісіне қатысты алғашқы сот отырысы өтті, деп хабарлайды pavlodarnews.kz тілшісі.
Аталмыш факті бойынша ҚР Қылмыстық кодексі 296-бабының 3-тармағы және 297-баптары бойынша қылмыстық іс қозғалды.
Естеріңізге сала кетсек, қайғылы оқиға үстіміздегі жылдың 24-қыркүйегінде, облыс орталығындағы Кутузов-Шөкин көшелерінің қиылыстарында орын алды. Toyota Land Cruiser 100 тізгіндеген жас жігіт үш адамды қағып кетіп, өмірлерін қиған. Джипті жүргізген астаналық Жамбыл Мұхантаев Павлодарда танымал бизнесменнің туысы болып шықты. Аталмыш темір тұлпардың ішінде тойдан келе жатқан төрт жас адам болған. Сараптама нәтижелеріне сүйенсек, олардың барлығы мас болғаны анықталды. Қайғылы оқиға нәтижесінде 47 және 50 жасар әйел мен 43 жасар ер азамат көз жұмды.
Сот отырысы барысында зардап шеккен тарап пен куәгерлерден жауап алынды. Айыпталушы 25 жасар Жамбыл Мұханьаев кінәсін толық мойындамайтынын жеткізді. Сотталушы жол-көлік ережесін бұзбағанын айтып, жолды бағдаршамның жасыл түсі жанған сәтте өткенін алға тартуда. Ал өзіне тиесілі емес джипке, яғни досы Батыр Дүйсебаевтың көлігін ішімдікті «аз ішкендіктен» жүргізгенін айтуда.
- Достарыммен «Арарат» кафесінде кездестік. 100-150 грамм арақ ішкен болатынмын. Арамыздағы ең «сауы» мен болғандықтан, досымның көлігін тізгіндедім. Машиниман сағатына 100 шақырым жылдамдықпен жүрдім. Кутузов-Шөкин көшелерінің қиылысынан өтіп бара жатқанда бағдаршамның жасыл түсі жанып тұрды. Дегенмен жолда келе жатқан басқа жеңіл көлік кедергі жасады. Оның артынан үш жүргінші шыға келді, мен оларды байқамай қағып кеттім, - дейді Ж. Мұхантаев.
Сотталушы жол апаты орын алған жерден кетіп қалуының себебін де түсіндірді.
- Үш адамды қағып кеткен соң, көлікті тоқтата алмадым. Себебі қорқып, есеңгіреп қалдым. Шамамен 200 метрді жүреп өткен соң тоқтап, үйіме кеттім. Жүргіншілерді соғып кеткенімді мойындаймын, бірақ жол ережесін бұзған жоқпын, - дейді ол.
Сот процесі барысында қайтыс болған азаматтардың туыстарынан жауап алынды. Прокурордың сұрақтарына қайғылы оқиға орын алған сәтті бір көлікте болған Аслан Сағалбаев жауап берді. Сот ісін судья Қайырбек Елемесов жүргізуде.
Сот отырысының жалғасы 2015 жылғы қаңтардың 5-күні жалғасын табады. Кезекті процесте Ж. Мұхантаевтың достары Құмар Қиялбаев пен Батыр Дүйсебаевтан жауап алынбақ.